Сабага “Герой әтисе” күчмә фотокүргәзмәсе килде

Илебезне яклаган якташ су­гышчыларыбызның кыюлыгын, ру­хи ныклыгын һәм фидакарьлеген, Ватанга тугрылыгын, аның язмышы өчен җаваплылыгын  чагылдыручы  күчмә  күргәзмә  район мәдәният йорты бинасына урнашып,   анда республиканың төрле  районнарыннан булган 45 әтинең һәм аларның герой улларының  фотолары тәкъдим ителгән.

Аларның дүртесе Россия Герое, калганнары “Батырлык” ордены һәм башка дәүләт бүләкләренә лаек булганнар. Герой уллар тәр­бияләп үстергән әтиләргә багышланган күргәзмәдә  райондашларыбыз – махсус хәрби операциядә һәлак булган Иләбәр егете  Айсаф  һәм аның  әтисе Айдар Галиевлар да бар. Әтиләрнең йөзләрендә чын ирләр һәм Ватан сакчылары булган уллары өчен горурлык хисләре балкый, шул ук вакытта моңсу күзләрендә югалту ачысы чагыла. Шулай ук күргәзмә районыбызның махсус хәрби операциядә катнашучы дүрт  хәрби  һәм һәлак булган ике батыр сугышчының  әтиләренең  фотопортретлары бе­лән дә тулыландырылган.

“Республика районнары буйлап йөрүче «Герой әтисе» дип исемләнгән күчмә  күргәзмә Дәү­ләт Думасы депутаты Татьяна Ларионова инициативасы һәм  «Ва­танны саклаучылар» дәүләт фон­ды белән берлектә оештырылды. Ул бүгенге һәм киләчәк буыннар тынычлыкта яшәсен өчен үз гомерләрен биргән якташларыбызга истәлек һәм хөрмәт билгесе. Күргәзмә белән һәркем таныша ала”, – дип ачыклык кертте “Бердәм Россия” партиясенең җирле бү­лекчәсе башкарма комитеты җи­тәкчесе  Фәрит Зарипов.

Күргәзмә ачылу тантанасын­да  район башлыгы Рәис Миң­неханов катнашып, рес­пуб­лика кү­ләмендәге әлеге чараның  әһә­­­миятен билгеләп узды. “Егет­лә­ребез тыныч тормышыбыз өчен хезмәт итәләр.  Кызганыч, югалтулар да бар. Аларның  гаи­лә­ләренә, әти-әниләренә зур сабырлык телим.  Ватан сагында һәлак булучыларның исемнәрен мәңгеләштерү, хәтердә саклау, ки­ләчәк буыннарга җиткерү – һәрберебезнең изге бурычы”, – ди­де район башлыгы. Шулай ук  Теләче һәм Саба районнары хәрби  комиссары, районның “Әтиләр сою­зы”  җитәкчесе Фәнис Закиров,  Ватанны саклаучылар фондының  район социаль координаторы  Әл­фия Мәүлетова да үз чыгышларында улларында ватанпәрвәрлек хис­ләре тәрбияләгән әти-әни­ләр­гә олы ихтирам сүзләре  җит­­керделәр. “Махсус хәрби опе­­рациядә  300дән артык  райондашыбыз катнаша. Алар батырлык һәм каһарманлык үрнәкләре күр­сәтәләр. Илебез тынычлыгы өчен үзләренә тапшырылган хәрби бу­рычны үтәгәндә гомерләрен биргән егетләр алдында башыбызны иябез”, – диде Фәнис Закиров. Һәм район хәрби ко­миссариатына якташларыбыз исеменә юлланган Дәүләт бү­­ләкләре белән таныштырды.    Махсус   хәрби опе­рациядә күр­­­сәткән батырлыклары өчен вафатыннан соң “Батырлык” орденына лаек булган  Сабадан  Ленар Юнысовның бүләге  тормыш ип­тәше Ләйсән Гафур кызына тапшырылды.  “Минем ирем  Ленар  контракт нигезендә 2024 елның 30 сентябрендә махсус хәрби операциягә китте. Аңарчы  бик нык әзерләнгән, өйдә ул хакта сөйләшүләр күп булды.

Чөнки иремнең  ватанпәрвәрлек хисләре бик көчле иде. “Мин анда барырга тиеш, илне, Ватанны саклау – ир-атларның бурычы. Безнең бабайлар да шул җирләрне азат итүдә  катнашканнар”, – дип малайларга да еш кабатлады. Безнең өйдә Бөек Ватан сугышы турында, революция вакытындагы вакыйгалар хакында әңгәмәләр еш булды.  Ватанпәрвәрлек хисе көчле булуы, аны  шушындый карарга китерде. Башта ике атналык өйрәнүләрдә булды,  аннары Селидово шәһәрен  азат итүдә  катнашты. “Минем өчен борчылмагыз. Ашарга да җитә, кораллар да бар. Җиңеп кайтабыз, барыбыз да   көрәш  рухлы егетләр җыелган”, – дип әйтә иде.  30 ок­тябрьдә вафат булганлыгы турында 8 ноябрьдә хәбәр килде.  Әтиебез - Ленарым белән бик горурланабыз. Аның бу адымы ничек олы йөрәкле булуын, илебезне, Ватаныбызны яратуын күрсәтә. Әтиләренең  батырлыгы  улларыбызга зур үрнәк, истәлеген мәңге онытмаслар”, –  дип күз яшьләре белән сөйләде  тормыш иптәше Ләйсән  Юнысова.  Шулай ук “Батырлык” ордены  Донецк Халык Республикасының  Ясынувата  районы Мариновка авылында  хәрби операция барышында  2024 елның 17 сентябрендә  батырларча һәлак булган  Олы Арташ авылы егете  Илфар Галимҗановның әти-әнисенә тап­шырылды. Бүгенге көндә махсус хәрби операциядә булган  Килдебәк авылы егете Инсаф Әхмәтшин хезмәт иткән  хәрби частьтан килгән Рәхмәт хаты әнисе  Зөлхәбирә Арслан кызына тапшырылды. “Улыгызның мах­­сус хәрби операция барышында үзен чын Ватанның сакчысы, командирның ышанычлы ярдәмчесе, җаваплы һәм инициативалы  хәрби итеп күрсәтүе һәм хезмәттәшләренә бар яктан өлге булуы өчен сезгә зур рәхмәт белдерәбез. Гаиләдә алган яхшы тәрбия аңа катлаулы хәрби бурычларны  җиңеп чыгарга, ныклы карарлар кабул итәргә зур ярдәм итә” – дип язылган полковник Е.Дараев кул куйган Рәхмәт хатында.

Әлеге тантаналы чарада махсус хәрби операциядә катнашу­чы һәм һәлак булганнарның әти-әниләре, гаиләләре, Иске Икшермә кадет мәктәп-интернаты кадетла­ры һәм Саба гимназиясенең яшь­ар­миячеләре дә катнашты. Күр­гәз­мәнең батыр егетләрне искә алу белән беррәттән, яшь буын­га  хәрби-патриотик тәрбия би­рү­дә, ватанпәрвәрлек сыйфатларын үстерүдә  дә роле бихисап. Фо­то­күргәзмә 1-7 апрельдә  Байлар Сабасында, 8-14 апрель көннәрендә Шәмәрдән мәдәният йортында эш­лиячәк.  Иртәнге 8.00 дән 16.30 сәгатькә кадәр  күргәзмә белән танышырга мөмкин.  Балалар өчен керү вакыты 13.00-15.00 сәгатьләрдә каралган. Күргәзмәдә  өстәмә рәвештә урын алган районыбызның алты батыры арасында Шәмәрдәннән герой әтисе  Әлтәф Мөбарәков һәм улы Раушан  да бар. Раушан үзе дә гаиләсе белән  әлеге тантаналы чарада катнашып,  күргәзмәнең  роле зур булуын әйтеп узды.  “Мин 2022 елның февралендә мобилизацияләнеп махсус хәрби  операциягә киттем. 2024 елда Авдеевкада барган каршылыкларда  яраландым.  Сәламәтлек бу­енча группага чыгу сәбәпле, башка бара алмадым.  Гаиләм белән Шәмәрдәндә яшибез. Бер бала үстерәбез. Барыбызны да тизрәк су­гышлар тәмамланып, егетләрнең исән-сау әйләнеп кайтуларын кү­рү теләге берләштерә. Мондый күргәзмәләр бүгенге көндә махсус хәрби операциядә катнашучы егетләр һәм аларның  әти-әниләре өчен бик кирәк.  Әлбәттә, тылдагы мохит  тә  зур роль уйный.  Тылдан терәк көчле   булса, анда да яхшы булачак”, – ди  Раушан Мөбарәков.

Шулай ук “Герой әтисе” күр­гәз­­мәсендә  Олы Шыңардан  бү­генге көндә улы Фиркать махсус хәрби операциядә катнашучы Фи­даил Габдрахманов, ике улы мо­би­ли­зацияләнеп, Радик  хәбәрсез югалганнар исемлегендә теркәлеп,  икенчесе Рамил бүген дә ил сагында булган   герой әти Җәмил Янгучин, Шәмәрдәннән 2024 елның 1 июнендә Херсон өлкәсендә батырларча һәлак булган Данил Гыйль­метдиновның  әтисе Дамир Мин­нехуҗа улы, Олы Арташтан  герой әти  Илфат  Галимҗанов,  Сабадан Илфат Фәләхов  та бар. Илфат әфәнденең  улы Илназ Фәләховның  чираттагы ялга кайткан вакыты булып, гаиләсе белән  тантаналы чарада катнашты. “2025 Ватанны саклаучылар елы дип игълан ителде.  Мин бүген  чираттагы ялымда шушындый тантаналы чарада катнаша алуыма бик шатмын. Әлеге акция  Татарстанда беренчеләрдән булып старт алды. Гомумән,  Татарстан бердәмлек, татулык ягыннан да, шулай ук  гуманитар ярдәм буенча да башка төбәкләргә өлге булып тора. Мондый чара оештырганнары  өчен барлык хәрбиләр исеменнән бик зур рәхмәт”, – диде батальон командиры урынбасары Илназ Фәләхов.