Артыгыздан күзәткәнне сизәсезме?

Рөстәм  АСАЕВ, Татарстанның атказанган артисты:

 
–  Мин моңа каршы түгел. Кичә генә без яшәгән йортта да камера куйганнарын күрдем. Гади халык нәрсәгә инде ул дисә дә, хөкүмәткә кирәк ул. Үзебезгә дә кайчак файдасы тиеп куя. Артист халкын камерасыз да әйбәт тикшерәләр. Ә менә җи­наять­ләр, тәртипсезлекләрне ачыклар өчен ярдәме булыр дип уйлыйм мин. Бераз гына кешедә курку булып, бәлки, алар начар эшлә­рен эшләми калыр.

Альбина АРСЛАНОВА, инженер (Түбән Кама):

 
– Видеокамераларга карашыгыз ничек дип сорасалар, элегрәк нәрсә дип җавап бирергә белмәс идем. Хәзер, кирәк, дим. Берничә ай элек поликлиникага баргач, кыйбатлы кесә телефонымны югалттым. Табиб кабинеты янында чират торганда бар иде. Приемда булып, аскы катка төшкәч, эшкә шалтыратмакчы идем, телефонны таба алмадым. Кире өске катка менеп, эзләп, сораштырып карадым, шундагы халык, күрмәдек, диде. Аннары иремнең телефоныннан минем номерны җыйдык. Тик файдасыз, телефоным суга төшкәндәй юкка чыкты. Полициягә хәбәр иткәч, бик оста гына табып бирделәр. Ничек, дисезме? Поликлиникада  видеокамералар урнаштырылган, шуннан карадылар. Табиб ишеге төбендә чират көткәндә аны урындыкка куйганмын икән. Мин кабинетка кереп киткәч, янымда утырган егет әкрен генә тирә-юньгә караштырып, телефонны кесәсенә салган. Полиция хезмәткәрләре егетнең эзенә тиз төште. Мин камераларны йорт ишегалларына, подъездларга куюга да каршы түгел.

Ленар НӘГЫЙМОВ, Дәүләт архивы хезмәткәре:

 
– Камераларны күп катлы йортларның ишегалларына урнаштырырга кирәк дип саныйм. Чөнки әти-әниләр балаларын ишегалдына уйнарга чыгарып җибәрә. Камерадан кем белән аралашканын, кайда йөргәнен кү­рә алачак. Юл һәлакәтләрен киметергә дә булыша бу. Тик менә  офисларга, эш бүлмәлә­ренә, БДИ үткәрү пунктларына  куюны хупламыйм. Чөнки уңай­сыз­лык­лар тудыра. Кеше югалып калырга мөмкин.

Хәмит ӘХМӘДУЛЛИН, машина йөртүче (Казан):

 
– Видеокамера турында күп ишетеп белсәм дә, бик исем китми иде. Быел ике-өч ай элек йортыбызның тышына, эчке ягына видеокамералар урнаштырдылар. Бик озак кына эшләп китә алмады әле ул. Хәзер барыбыз да кереп карый алабыз. Йорт подъездында чүп калдырып ки­түчеләр бар, тәртипсезлек кылып йөрүчеләр дә юк түгел. Ачык­лый торгач, бер үк кешеләр үз­ләренең пычрагын җыештыр­мый булып чыкты. Күпкатлы йортта тәртипсезлек кылып йө­рү­челәрнең күпчелеге вакытлыча фатир алып торучылар икән­леге билгеле булды. Ватсапта язышабыз да, тәртипсезләрне шундук акылга утыртабыз. Гаеп­леләр бер­нишли алмый, башкача андый эшкә куллары бармас, шәт.

Физәлия ГАЛӘВЕТДИНОВА, администратор:

 
– Кибетләрдәге камералар  каракларны тотарга ярдәм итә. Зур сәүдә үзәкләрендә алардан башка булмый. Мин үзем ябык учреждениедә эшлим. Әмма безнең офиста камера бөтенләй юк. Килгән кешеләрне вахтада язып кертәләр. Чат саен күзәтү җайланмасы куюның кирәге юк. Әйтик, бизәнү салонында сине күзәтеп утырсалар, рәхәт түгел бит. Кешенең шәхси эшенә  тыкшынырга ярамый.

Мөнирә Гафурова, пенсионер:

 
– Элек безне күзәтеп тормадылар. Тормыш та бүгенге кебек буталчык түгел, бер-беребезгә ышаныч та бар иде. Күрше белән еш аралаштык, фатир ачкычларын бер-беребезгә тапшырдык. Безнең ишек төймәсенә берәрсе басса да, өйдә булмасак, ул ишетеп чыга иде. Хәзер кычкырсаң да беркем чыкмый. Безнең заманда камералар вазифасын күршеләр башкарды. Янәшәңдә тугры кешеләрең булганда, бүген дә мондый җиһазларны кирәк санамыйм.

Фото: https://pixabay.com | ollis_picture

http://www.vatantat.ru