Россия Хисап палатасы урман янгыннарыннан килгән зыянны бәяләде

2019 елның беренче яртысында Россиядә урман янгыннарыннан килгән зыянның бәясе 2,4 млрд сум тәшкил иткән. Россия Хисап палатасы үзенең Facebook аккаунтында шундый саннар турында хәбәр итә.

Ведомство мәгълүматлары буенча, алты ай эчендә 7,6 мең янгын очрагы теркәлгән. Инфографика буенча, урман янгыннарының төп сәбәбе (52 проценты) — кеше факторы. Янгыннар 18,8 процент очракта яшен аркасында чыккан.

Урман янгыннары проблемасы комплекслы хәл итүне таләп итә — бу утның контрольсез таралуын, икътисади һәм экологик югалтуларны булдырмый калырга мөмкинлек бирәчәк, диделәр Россия Хисап палатасында.

Июль азагында Татарстан күгенә Себер территориясендәге урман янгыннары төтене таралды.

Фото: https://pixabay.com

https://tatar-inform.tatar