Бесланны онытырга ярамый

Моннан 12 ел элек барыбызны да тетрәндергән Беслан мәктәбе фаҗигасе безне берләштерә, уяу һәм бердәм булырга чакыра. Терроризмның таралуы ул - Россия­неке генә түгел, халыкара проблема. Шул ук уңайдан районның мәгариф учреждениеләрендә балалар иминлеге айлыгы үткәреләчәк. Мәгариф идарәсе боерыгы белән расланган чаралар планы нигезендә мәктәпләргә район эчке эшләр бүлеге хезмәткәрләре дә җәлеп ителәчәк, террорчылык куркынычы туганда укучыларны эвакуацияләү буенча күнегүләр, сыйныфларда "Иминлек дәресләре" үткәрү күздә тотыла. Шулай ук 3 сентябрьдә "Экстремизмга - юк" дигән темага бердәм республика дәресләре үткәрүгә дә әзерлек алып барыла.