Район башлыгының чыршы бәйрәмендә

автор, 16 гыйнвар 2013 - 09:16

999

Өченчекөн кышкы каникуллар төгәлләнеп, мәктәпләрдә укулар башланды. Шулай да укучыларга күңелсезләнергә сәбәп юк, аларның күңелләрендә матур мизгелләре белән ел дәвамында сакланырлык чаралар районда күп үткәрелде.

Ә 12 гыйнварда Лесхозда узган Саба районы башлыгы чыршы бәйрәменә уку алдынгылары һәм мәктәпләрнең җәмәгать тормышында актив катнашучы, район һәм республика күләмендә талантлы булуларын күрсәтә алган укучылар чакырылган иде. Араларында ишле гаиләдән дә балалар бар.

Лесхоз мәдәният йортының бәйрәмчә бизәлгән залына 23 мәктәп һәм аграр көллияттән ике йөз укучы җыелды. "2012 елны да матур гына тәмамладыгыз. Кемдер спортта, сәнгатьтә үзенең сәләтен күрсәтте, тырышлыкларыгыз өчен рәхмәт сезгә. Иң олы байлык - саулык һәм белем. Бөтен әйберне сатып алып була, ә аларны юк. Бүгенге вакытыгызның кадерен белеп, киләчәктә тагын да тырышып укыгыз, яңалыкка омтылып яшәгез", - диде район башлыгы Рәис Миңнеханов балаларны тәбрикләп.

Матур итеп, бәйрәмчә костюмнар кигән балаларга һәм алар белән горурланып утыручы әти-әниләренең, укытучыларның бәхетле йөзләренә каравы да күңелле!

Бәйрәм кунакларын иң элек узган елның символикасы Аждаһа, Елан һәм Кар кызы котлады. Балаларның ихлас чакыруларын ишетеп Кыш бабай да озак көттермәде. "Оныклары" янына чыгуга котлау сүзләрен җиткереп, чыршы тирәли күңел ачты. Сәнгать җанлы кызлар-егетләр биеп, җырлап бәйрәм кунакларын сәламләде.

(Дәвамын газета битләреннән укый аласыз)

Замирә Касыймова.

Нурхан Дәүләтов фотолары.