ЗАГСлар бәйгесендә – 3нче урын

Россиядә гражданлык хәле актларын теркәү бүлеге органнары барлыкка килүгә быел 100 ел тулу уңаеннан республикада ЗАГС бүлеге хезмәткәрләре арасында һөнәри осталык бәйгесе игълан ителде. Зоналарда чираттагы бәйге Әтнә, Саба, Балтач, Кукмара, Питрәч, Теләче, Мамадыш районнары конкурсантлары катнашында Кукмараның Поч.Кучук авылында уздырылды. Сабадан Шәмәрдән авыл җирлеге башкарма комитетының әйдәп баручы белгече Эльвира Шәфигуллина "Никахны татар телендә тантаналы теркәү церемониясе" номи­нациясендә 3нче урынны алды. "Призер булуымнан канәгатьмен. Зал тын калып тыңлады. Син беренче урынга лаек идең дигән соклану белдереп әле дә шалтыратучылар бар",- дип кичерешләрен уртаклашты Эльвира.