Бала тәрбияләү буенча пособиене өч яшькә кадәр озайтырлармы?

Депутатлар бала тәрбияләү буенча пособиене өч яшькә кадәр озайтырга тәкъдим итә. Бу хакта әлеге закон проектын әзерләгән Дәүләт Думасы депутаты Сергей Вострецов сүзләренә сылтама белән «РИА Новости» язып чыкты. Шулай ук әлеге инициатива өч яшьтән җиде яшькә кадәрге балаларына балалар бакчасында урын булмаган затларга да акча түләүне күздә тота. Айлык түләү суммасы бу очракта һәр балага өч мең сумны тәшкил итәчәк. Хәзер бала карау буенча түләүләр беренче ел ярым дәвамында гына бирелә, аның күләме уртача хезмәт хакының якынча 40 процентын тәшкил итә, дип яза "Безнең гәҗит".