Балтач районында яна торган йорттан күршеләре ир-атны алып чыккан

Балтач районында күршеләре яна торган йорттан 48 яшьлек ир-атны алып чыккан. Бу хакта “Татар-информ” агентлыгына Россия Гадәттән тыш хәлләр министрлыгының Татарстан буенча Баш идарәсе матбугат хезмәтеннән хәбәр иттеләр.

Янгын Кенәбаш авылының Тау урамындагы 2нче йортта кичә кич чыккан. Урынга 10нчы янгын-коткару часте, Рәхимов исменедәге ирекле янгын сүндерү отряды, шулай ук тормыш иминлеген тәэмин итү хезмәте хезмәткәрләре килгән.

Ут 40 квадрат метрлы йортны, мунчаны ялмап алган, башка корылмаларга күчү куркынычы зур булган. Янгын сүндерүчеләр 30 минут эчендә утны сүндергән. Хуҗа зыян күрмәгән, аны күршеләре алып чыккан булган.

Янгынның беренчел сәбәпләре – электр җиһазларын куллануда куркынычсызлык кагыйдәләрен сакламау.

Фото: ГУ МЧС России по РТ

http://tatar-inform.tatar