Чаллы элеваторын чамадан тыш тавыш чыгарган өчен штрафка тартканнар

Чаллыда Элеваторная Гора бистәсендә яшәүчеләр шикаяте буенча “Чаллы элеваторы” җәмгыятен чамадан тыш тавыш чыгарган өчен штрафка тартканнар. Бу хакта шәһәр судында хәбәр иттеләр.

Бистәдә яшәүчеләр Роспотребнадзорның Татарстан буенча идарәсе Чаллы бүлегенә шикаять биргән.

Роспотребнадзор белгечләре административ тикшерү үткәргән. Моның өчен алар төнлә биредә яшәүчеләр йортына килеп, тавыш дәрәҗәсен үлчәгәннәр. Техник һәм вентиляция җиһазлары эшләве сәбәпле чыккан тавыш 32 Децибел тәшкил иткән, ә норма – 30 Децибел.

Шәһәр суды карары белән “Чаллы элеваторы” җәмгыятенә хокук бозган өчен 10 мең сум күләмендә штраф салынган.

Фото: http://aif.ru

http://tatar-inform.tatar