Эмиль Гариповның хыялы тормышка аша!

24 июнь көнне Арча районының Урта Бирәзә авылында тарихи Сабан туе узачак. Бу Сабантуйны быел «Ак Барс» хоккей командасы белән Гагарин Кубогын откан капкачыбыз Эмиль Гарипов оештыра һәм ул анда Гагарин Кубогын алып кайта.

…Моннан ничәдер ел элек, «Ак Барс» хоккейчылары беренче Гагарин Кубогын откан чакта, Эмиль Гарипов әтисе Рамил белән Урта Бирәзә авылы янындагы тау битләрендә күнегүләр уздыра, йөгерә. Шулай бер көнне Эмиль әтисенә — татарча көрәш буенча Россиянең спорт остасына болай дип әйтеп куя: «Әти, әгәр дә кайчан да булса Гагарин Кубогын отсам, мин аны авылга алып кайтачакмын», дип белдерә. Әлеге сүзләр фәрештәләрнең «амин» дигән чагына туры килгән, күрәсең… Эмильне хыялы тормышка аша һәм ул дәрәҗәле трофейны Урта Бирәзәгә алып кайтырга була.

Оештыручылар хәбәр иткәнчә, Гагарин Кубогы иң элек Арчаның үзенә кайтачак. Биредә Эмиль Гарипов һәм аның иптәшләре җирле яшь хоккейчылар белән очрашу уздырырга планлаштыра. Шуннан Кубок Урта Бирәзәгә юл тотачак.

Эмиль йөгереп йөргән әнә шушы тау битендә узачак Сабан туеның төп бизәге булган көрәш ярышлары дүрт үлчәү категориясендә узачак: 70, 80, 100 һәм 130 кг.га кадәр үлчәүләрдә. Үз авырлыкларын җиңү яулаган кыйммәтле бүләкләр дә, баш батырга аталган төп бүләк — автомобиль дә инде кайтып җиткән. Оештыручылар Урта Бирәзә авылы Сабан туена теләгән һәр көрәшчене чакыра, бернинди чикләүләр юк. Бәйрәм сәгать 10.00да башланачак. Мәйдан уртасында исә Гагарин Кубогы торачак!

Бәйрәмгә рәхим итегез!

Фото: скриншот инстаграм

http://idel-tat.ru