Илназ Баһ: Шәфкать туташына гашыйк булдым!

- Клипны быел җәй ахырында Питрәч районы Шәле авылында режиссер, сценарист Замирә Рәҗәпова белән төшердек. Бу - Замирә белән башкарылган беренче уртак хезмәтебез. Ә клипның эчтәлеге болайрак: авыл медпунктына шәһәрдән шәфкать туташы кайта. Бу рольне Башкортстан кызы башкара. Аның чибәрлеге авыл егетләрен, шул исәптән мине дә таң калдыра. Шәһәр кызына тәмам гашыйк булгач, аны урларга ниятлибез. Ләкин әни янына өйгә алып кайткач, аның шәфкать туташы түгел, ә әбисе булуы ачыклана. Клипны төшерүдә ярдәм иткәннәре өчен Питрәч районы хакимиятенә, мәдәният бүлеге башлыгы Айгөл Хикмәтуллинага, Шәле авылы халкына, аеруча әбиләренә, "Рәвешләр" егетләренә, Замирәгә һәм аның төркеменә рәхмәтемне белдерәм, - дип сөйләгән Intertat.ru хәбәрчесенә Илназ Баһ.