“КАН АЛДЫРУ — КҮП АВЫРУДАН ДӘВА”

Бу чыннан да шулаймы? Борынгы әби-бабаларыбыз киң кулланган әлеге дәвалау ысулы турында халык табибы Алмаз ЗАРИПОВтан сораштым. Ул да дәвалауның шушы төрен еш файдалана икән.
— Алмаз, кеше тәненнән пычрак канны чыгару ни өчен кирәк?
— Кан — кеше организмындагы иң төп элементларның берсе. Ул күп процесста, мәсәлән, күзәнәкләргә кислород илтүдә, әгъзаларга гормоннар, туклыклы матдәләр, алмашу продуктлары җиткерүдә катнаша. Тәндәге температураны саклап тоту да, тоз-су балансын саклау да канга йөкләнә. Ул үтәгән функцияләрне санап бетерерлек түгел. Хиҗама ярдәмендә тәннән пычрак, үзлеген югалткан канны чыгарып, запас-торгызылу процессы башкарыла. Ягъни чыккан кан урынына яңасы эшләнә, ул кешенең халәтен яхшырта һәм күп авырудан котылу мөмкинлеген бирә.
Хиҗама — канны вакуум (банка) ярдәмендә суырып чыгару. Авырганда аркага банка салу — электән килгән гадәт. Бу да шул ук банка салу, әмма монысында кечкенә тишем ясала. Хәзер бездә сөлек салдыру популяррак. Сөлек кую да — хиҗама кебек үк кан алдыру бит...
— Кан алдыру нинди авыруларга дәва була ала?
— Простатит, арка авыртуы, җенси көчсезлек, югары кан басымы, веналар тараю яки тыгылу, җилкә яисә муен, баш авырту, туберкулез, тән тиресе авырулары, мускуллар авырту, кул-аяклар ою, ревматизм, югары күз басымы, өянәкләр, йөрәк авырулары күзәтелгәндә, хиҗама ысулы кулланыла. Кан алдырудан соң умыртка баганасының сыгылмалылыгы арту да билгеле.
— Белүемчә, хиҗаманы косметология өлкәсендә дә еш кулланалар...
— Әйе, замана хатын-кызлары арасында нәкъ шушы ысулны сайлаучылар күп. Чөнки кан алдыру кан әйләнешен яхшырта, гормоннар эшләнешен көчәйтә, эчке әгъзаларда сыеклык йөрешен тизәйтә. Ә бу үз чиратында картаю процессын акрынайта һәм хәтта туктата...

Фото: https://pixabay.com | DR-7Wellness

https://vk.com/irekmaydani