Казан укучысы рус әдәбиятыннан Бөтенроссия мәктәп укучылары олимпиадасында җиңде

Казанда рус әдәбияты буенча Бөтенроссия мәктәп укучылары олимпиадасының йомгаклау этабын ябу тантанасы булды. Татарстан һәм Мәскәү мәктәпләрендә укучылар олимпиаданың абсолют җиңүчеләре дип табылды.

Олимпиада 31 марттан 6 апрельгә кадәр узды. Йомгаклау этабында Россиянең 70 субъектыннан 270кә якын укучы катнашты.

Чараны ябу тантанасында олимпиадада катнашучыларны Россия Мәгариф һәм фән министрлыгының гомуми белем бирү өлкәсендә Дәүләт сәясәте департаменты директоры Андрей Петров сәламләде.

Мәктәп укучыларына шулай ук Татарстан вице-премьеры Ләйлә Фазлыева мөрәҗәгать итте. «Сез җиңүчеләр һәм илнең иң яхшы балалары, чөнки әдәбиятны яратасыз», - дип искәртте ул.

Олимпиада нәтиҗәләре буенча, IX сыйныф укучысы Софья Бабина (Татарстан), X сыйныфта белем алучы Мария Страдымова (Мәскәү) һәм XI сыйныф укучысы Наталья Лях (Мәскәү) абсолют җиңүчеләр дип табылды. 

Фото: tatarstan.ru