Кырыгалдарлар ике хатын-кызның 128 мең сум акчасын үзләштергән
Явыз ниятле кешеләр үзләрен банк хезмәткәре һәм иминият агенты дип таныштырган. Әлеге ике очрак буенча тикшерү эше дәвам итә.
Казанда яшәүче 53 яшьлек хатын-кызның телефонына банк картасының эштән чыгуы турында язылган смс-хәбәр килеп ирешә. Мәсьәләнең очына чыгарга теләгән хатын-кыз күрсәтелгән телефон номеры буенча шалтыратып карарга була. Аның белән сөйләшкән ир-ат, билгеле инде, әлеге хәбәрнең "дөреслеген" раслый, "булышырга" ышандыра. Үзен банк хезмәткәре дип таныштыра. Хатын-кыз кырыгалдарның кармагына эләккәнен сизми дә кала - якындагы банкоматта билгесез ир-ат кушканнарны эшли һәм 53 мең сум акчасыннан колак кага.
Башкаланың Идел буе районында яшәүче 88 яшьлек әби кеше тагын да зуррак суммадагы акчасын югалткан. Аның фатирына билгесез хатын-кыз ишек кага, үзен иминият агенты дип таныштыра һәм якын арада акча алышыну, иске купюраларны яңасына алмаштыру кирәклеге турындагы ялган хәбәрен җиткерә. Әби кеше кырыгалдарга 75 мең сум акчасын чыгарып бирә. Ә "иминият агенты" аңа ялган акча биреп калдыра. Әби кеше алдануын бераз вакыт узгач кына аңлап ала.
Следите за самым важным и интересным в Telegram-каналеТатмедиа
Нет комментариев