Мордовиядә, Россиядә беренче булып, йөкле хатыннарны абортка этәргән өчен штраф керттеләр

Шул ук вакытта пациентканың табибы тарафыннан йөклелекне өзүгә медицина күрсәткечләре барлыгы турында хәбәр итүе маддәгә эләкми. «Российская газета» шул турыда яза.

Яңа закон республика Иҗтимагый палатасы инициативасы буенча төбәк Дәүләт җыенынының соңгы сессиясендә кабул ителде.

«Демографик проблема бүген төп чакыруларның берсе, – дип белдерде Мордовия Иҗтимагый палата рәисе Иван Капитонов, проектны депутатларга тәкъдим итеп. – БМО мәгълүматлары буенча, Россия абортлар саны буенча бөтендөнья лидеры булып тора: 1000 хатын-кызга 53,7 оборт туры килә. 10 йөклелекнең бишесе ясалма рәвештә өзелә. Мордовия гомуми фонда бераз яхшырак күренә: бездә 1000 хатын-кызга 46 аборт туры килә».

«1920-1991 елларда РСФСРда иң уртача исәпләүләр буенча, якынча 180 миллион бала үз аналарының карынында үлгән. Росстат мәгълүматы буенча, 1991 елдан 2021 елга кадәр Россия территориясендә шәхси клиникаларда йөклелекне өзү очракларын исәпкә алмыйча 50 695 000 аборт ясалган. Соңгы 100 ел эчендә безнең илдә әти-әниләр тарафыннан 230 миллионнан артык бала үтерелгән. Бу коточкыч сан, ахырга кадәр җәмгыять тарафыннан аңлашылмаган, адекват бәя алмаган», – дип сөйләде ул.

Закон көчле дебатлардан соң кабул ителде. Аның инициаторлары Мордовия закон чыгаручылары үрнәгенә башка төбәкләр дә иярер дигән өметләрен белдерде.

Шунысын билгеләп үтәргә кирәк, Мордовия Тула, Рязань, Смоленск һәм Ленинград өлкәләре белән Россия төбәкләре арасында туучылар саны буенча иң артта калган төбәкләр бишлегенә керә.

Тулырак: https://tatar-inform.tatar/news/mordoviyada-rossiyada-berence-tapkyr-iokle-xatynnarny-abortka-etargan-ocen-straf-kerttelar-5874531