Нефть җитештерүче илләр кара алтынны суыртуны киметергә ниятләми

Әмма Согуд Гәрабстаны табу дәрәҗәсен азайту турына сөйләшүләр алып бара. Бу хакта Согуд Гәрабстанының нефть министры Али әл-Наими белдергән.

Бу мәгълүматтан соң чәршәмбе көнне нефть бәясе 2 процентка арзанайган, "Brent"ның барреле 32 доллардан да кимрәккә сатылган. Көн саен базарга артык 1 млн баррель нефть чыга дип санала.

"Bloomberg" агентлыгы хәбәр иткәнчә, Лондонның "ICE Futures" биржасында "Brent" маркасына апрель фьючерслары бүген иртән 1,2 процентка - барреле 32,87 долларга кадәр кимегән. Нью-Йорк товар биржасында (NYMEX) "WTI "нефтенә март фьючерслары 2,1 процентка - барреле 31,19 долларга кадәр арзанайган.

РФ Энергетика министры Александр Новак элегрәк нефть табуны туктатып тору буенча сөйләшүләр 1 мартка кадәр тәмамланырга мөмкин дип белдергән иде, дип яза "Интерфакс".

Татар-информ