Петербург халыкара икътисади форумында Татарстан роботларын сатып алганнар

Петербург халыкара икътисади форумында Татарстанда ясалган өч роботны сатып алганнар. Бу хакта «Татар-информ» агентлыгына «Эйдос-Робототехника» ҖЧҖ генераль директоры Антон Сурьянинов хәбәр итте.

Роботларны мебель ясау һәм балалар мәйданчыкларында эретеп ябыштыру эшләрен башкарган вакытта файдаланачаклар.

«Җитештерүдә биш кеше хезмәтен бер робот алыштырачак», - дип искәртте Сурьянинов.

Роботларны бизнес вәкилләре сатып алган. Килешүләр быелның көзендә төзеләчәк. Килешүнең бәясе хәбәр ителми.

Татарстанда ясалган роботларга берничә зур предприятие кызыксыну белдергән.

Фото: Александр Третьяков