Россия сәүдә үзәкләрендә кинотеатр һәм балалар комплексларын беренче катка күчерәчәкләр

Россия Дәүләт Думасы сәүдә үзәге хуҗаларына кинотеатр һәм балалар комплексларын аскы катларга күчерергә кушачак, дип хәбәр итә ТАСС агентлыгы.

Дәүләт Думасы комитеты рәисе урынбасары Анатолий Выборный инануынча, инде быел ук сәүдә үзәге хуҗалары үзгәртеп кору эшенә керешәчәк.

Ул шулай ук Дәүләт Думасының куркынычсызлык таләпләренә җавап бирми торган хезмәтләр күрсәткән өчен җаваплылыкны көчәйтергә ниятләвен искәртте.

Моңа кадәр «Татар-информ» агентлыгы 25 мартта Кемеровоның «Зимняя вишня» сәүдә үзәгендә чыккан янгында 64 кешенең (шуларның 41е – балалар) һәлак булуы хакында хәбәр иткән иде. Әлеге факт нигезендә берничә маддә буенча җинаять эшләре кузгатылган. Дәүләт Думасының «Бердәм Россия» партиясе депутатлары РФ Төзелеш һәм торак-коммуналь хуҗалыгы министрлыгына кинотеатр һәм балалар комплексларын сәүдә үзәгенең икенче катыннан да өстәрәк урнаштыруны тыю үтенече белән мөрәҗәгать иткән.  

фото: pixabay.com

http://tatar-inform.tatar