"Рубин"ның баш тренеры итеп Корбан Бәрдыевны билгеләргә мөмкиннәр

Матбугат басмаларына ышансаң, Казан командасын алга таба кем җитәкләячәге 27 май көнне билгеле булачак. Ул көнне "Рубин" футбол клубының химаячеләр советы утырышы уза.

Билгеле булганча, испан белгече Хави Грасия белән Казан клубы арасында дүрт еллык килешү имзаланган иде. Әмма команданың быел чемпионатны тугызычы урында гына төгәлләве уңышсызлык буларак бәяләнә. Шуңа күрә Грасияне җибәреп аның урынына яңа тренеры чакыру ихтималы бик зур. Матбугат чаралар исә Казанга кабат Корбан Бәрдыевны димли. Төрекмән остазы "Рубин" белән 2001-2013 елларда җитәкчелек иткән иде.