Самосырово чүплегендә агачлар утырталар һәм күпьеллык үләннәр чәчәләр

Казанда Самосырово чүплеген рекультивацияләүнең биологик этабына шәһәр бюджетыннан 44 млн сумнан артык акча тотылачак. Заказчысы - шәһәрнең торак-коммуналь хуҗалыгы комитеты. Бу хакта Дәүләт сатып алулары сайтында хәбәр ителә.

Техник бирем буенча, чүплекнең өске ягыннан һәм ян якларына уңдырышлы туфрак катламын салырга, анда күпьеллык үләннәр чәчәргә һәм органоминераль ашламалар белән тукландырырга планлаштыралар. Шулай ук планда 1,1 меңнән артык агач һәм куак утырту бар.

• "Самосырово" - Татарстан территориясендә иң зур чүплек. Аның мәйданы - 32 гектар, биеклеге - 45 метр. Чүплекне рекультивацияләүне 2018 елның февраленнән бирле “Русремстрой” подрядчысы башкара.

Фото: Ильнар Тухбатов/архив

tatar-inform.tatar