Татарстанда COVID-19 коронавирус инфекциясе йоктырган беренче пациент вафат булган

Чаллы хастаханәсендә яңа төрдәге COVID-19 коронавирус инфекциясе йоктырган 1950 елгы ир-ат вафат булган. Бу хакта ТР Президентының матбугат хезмәте җитәкчесе Лилия Галимова хәбәр итте.

«Пациентны 13 апрельдә Чаллының йогышлы авырулар хастаханәсенә китергәннәр, 15 апрельдән ул «2нче шәһәр хастаханәсе» Дәүләт автоном сәламәтлек саклау учреждениесендә дәваланган. Аңа «Яңа төрдәге Covid-19 коронавирус инфекциясе, авыр форма, ике яклы полисегментар пневмония» дигән диагноз куелган булган», - диде Галимова.

Ир-ат шулай ук йөрәк-кан тамыры системасы авыруыннан да интеккән, 23 апрельдә аны ИВЛ-аппаратына тоташтырганнар.

«Мәрхүмнең туганнары һәм якыннарының кайгысын уртаклашабыз. Татарстанлыларны үзизоляция режимын үтәргә чакырабыз», - дип хәбәр итте ТР Президентының матбугат хезмәте җитәкчесе.

Чыганак: tatar-inform.tatar