Татарстанда “Кәгазьгә яңа тормыш бүләк итик” чарасында 12 тонна чимал җыйганнар

Татарстанда “Кәгазьгә яңа тормыш бүләк итик” чарасында 12 тонна чимал җыйганнар. Татарстан Республикасы мөселманнары Диния нәзарәте игълан иткән әлеге хәйрия акциясенә йомгак ясалды. Бу турыда Диния нәзарәте матбугат хезмәте хәбәр итте.

"Дүртенче тапкыр оештырылган акция кысаларында 20 көндә барлыгы 11,8 тонн макулатура тупланды. Хәйрия чарасында волонтерлар актив катнашты, алар кирәк булмаган кәгазьләрне җыю, бушату, үлчәү кебек эшләрдә ярдәмче булдылар. Акциягә республика халкы һәм башкалада яшәүчеләр дә кушылды", диелгән әлеге хәбәрдә.

Аеруча Татарстанның мөхтәсибәтләре - Аксубай, Кайбыч, Лаеш, Чистай, Кукмара, Әгерҗе, Буа, Алабуга, Әлки, Лениногорск, Сарман, Тәтеш, Бөгелмә, Чүпрәле, Ютазы, Саба мөхтәсибәтләре һәм Казан шәһәренең Мәскәү, Киров, Совет районы мәхтәсибәтләре зур активлык күрсәткән.

ҖЧҖ “Транснефть-саклык” төньяк-көнбатыш төбәкара идарәсе филиалы ярты тоннага якын макулатура тапшырды.

Республика районнарыннан җыелган гомуми макулатура күләме 9,6 тонна тәшкил иткән. Казанның Тукай урамында урнашкан Галиев мәчетендә 2,2 тонна кәгазь чималы тупланган.

Акция кысаларында җыелган акчалар «Зәкят» хәйрия фонды карамагындагы авыру балаларны дәвалау өчен тапшырылачак, диелгән әлеге хәбәрдә.

Фото: dumrt.ru

https://tatar-inform.tatar