Тоткарланучы гаебен тулысынча таныды

  Агымдагы елның 20 гыйнвары кичендә дәүләт автоинспекциясе хез­мәткәрләре Олы Кибәче авылында “ххх” маркалы автомобильне туктаталар. Аның белән идарә иткән Н.М.Вилдановның руль артына исерек хәлдә утыруы ачыклана. “Юпитер” алкотекторы ярдәмендә тикшерү нәтиҗәсендә, аның өргән сулышында 0,666 мг/л концентрациясендә этил спиртының барлыгы мәгълүм була. Хокук бозучыга карата административ беркетмә тутырыла.

 Н.Вилданов суд утырышында кат­­нашты һәм үзенең гаебен тулысынча тануын белдерде. Билгеле бул­ганча, 2025 елның 1 гыйнварыннан спиртлы эчемлек кулланган йөртүче транспорт чарасы белән идарә итсә, штрафны 45 мең сум күләмендә түли. Бик тә уфтандыра торган акча. Элеккеге 30 меңне сагынып сөйләргә генә калды. Сүз дә юк, штрафка тартылыр өчен юл-патруль хезмәте инспекторлары тарафыннан тоткарлануың кирәк. Мондый ихтималлылыкка кайберәүләр “Бәлки эләкмәм” дип карый. Н. Вилданов та шуңа өметләнгәндер. Барып чыкмый. Хәзер аңа шулай ук ел ярымга транспорт чаралары белән идарә итүдән тыелып торырга һәм 45 мең сум штраф түләргә туры киләчәк. Ике ай эчендә.

Юл хәрәкәте иминлеге комиссиясе ярдәмендә әзерләнде.