Үз көнеңне үзең күрмәсәң, синең өчен беркем дә тырышмаячак - Роберт Миңнуллин

Хәзерге заман язучылары үз әсәрләрен халыкка җиткерү чаралары турында уйларга тиеш.  Үз көнеңне үзең күрмәсәң, синең өчен беркем дә тырышмаячак. Бу фикерен Татарстанның халык шагыйре Роберт Миңнуллин «Татар-информ» агентлыгы хәбәрчесенә әйтте.

«Авылга чыгып китеп, үз китапларың, шигырьләрең белән таныштыруны хуплыйм. Димәк, язучы үзен һәм язган әсәрләрен халыкка җиткерердәй дәрәҗәгә үскән», - ди шагыйрь.

Роберт Миңнуллин фикеренчә, үз иҗаты белән халыкны таныштырыр өчен, шагыйрь талантлы булырга тиеш. «Халык күңеленә үтеп керердәй әсәрләр язарга кирәк. Шул очракта гына ул үзенең иҗатын актив рәвештә укучыларга җиткерәчәк», - дип исәпли ул.

Шагыйрь үзенең бәхетле чорда иҗат итүен әйтте. «Авыллар гөрләп торды, укучыларым да күп булды. Мәктәп тулы бала-чага, очрашулар зур күтәренкелек белән узды. Бүгенге көндәге үзгәрешләр бер дә яхшыга түгел. Кызганыч, авыл мәктәпләрендә балалар көннән көн азая, кызыксынулары да башка, алар - замана балалары», - ди ул.

Роберт Миңнуллин шигырьләрен Инстаграм социаль челтәренә урнаштыра. "Укучыларым язган комментарийларга карап, үзем өчен нәтиҗәләр ясыйм. Заман белән бергә атларга тырышам», - ди халык шагыйре. 

Фото: Рамиль Гали/архив

https://tatar-inform.tatar