Авыл җыеннарында нинди сораулар күтәрелә?

Узган атнада башкарма комитетларының 2024 елдагы эшчәнлеге турында Олы Нырты, Арташ, Олы Шыңар, Тимершык, Мишә, Килдебәк авыл җирлекләре башлыклары хисап тотты. Сөйләшүләрне Zoom платформасы аша тыңлау мөмкинлеге тудырылган иде. Гражданнарны барыннан да элек үзара салымның тотылы­шы кызыксындыра. Арташ авыл җирлегендә, мәсәлән, өч торак пунктта да урам юллары төзекләндерелгән. Язлы Арташта республика программасы буенча да МДСУ оешмасы 2 миллионлык эш башкарган. Шулай ук җирлек бюджетының 2, 295 миллион сумы төзекләндерүгә юнәлдерелгән. 2025 ел өчен 500 сумнан җыелган салым да шушы максатка тотылачак. Халыкның өстәмә керемнәрендә шәхси ярдәмче хуҗалыкларның да өлеше зур. Былтыр сыерлы кешеләр 7930 центнер сөт саткан. Мал, кош-корт асраучылар Авыл хуҗалыгы һәм азык-төлек министрлыгы аша 1 миллионнан артык субсидия алган. Җирлектә 21 кече һәм урта эшмәкәрлек субъекты эшчәнлек алып бара. 2024 елда яңа КФХ оешкан: Ильвира Гыймадиева жиләк культуралары үстерүгә грант откан.
 Үзара салым Килдебәк авыл җирлегендә дә юллар тө­зек­ләндерүгә тотылган. Барысы 400 метр юлга вак таш салынган. Халыктан җыйналган җир һәм мөлкәт салымнары да әллә кая китмәгән: коммуналь төзекләндерү, урамнарны кардан чистарткан, яктырткан өчен түләнгән. Җирлектә халыкка мәдәният, медицина, мәгариф учрежениеләре хезмәт күрсәтә. Килдебәк почта бүлегендә эш­ләүче булмау сәбәпле, халык, өлкән буын кешеләре кабул итә алмаса да, электрон түләү системасына күчеп бетеп бара. Җирлек дәүләт хезмәтләреннән файдалануда районда 2нче урынны били. 2025 елда Олы Нырты авыл җирлегендә үзара салымны үзәк­тә күпер ремонтлауга, Урта Ныртыда – чишмә, Завод-Нырты һөм Чәбия Чурчи авылларында урам юлларын төзекләндерүгә, Олы Шыңарда урамнарга вак таш салуга, Мишә җирлегендә Сабабашта асфальт салуны дәвам итүгә, Лесхозда ял итү урыны булдыруга, Тимершык җирлегендә юлларны һәм зиратларны тәр­типкә китерүгә, “Асылмалы басма” яңар­туга тотарга планлаштыралар. Демография хәленә тукталсак, санап кителгән, барлык җир­лекләрдә (Тимершыктан ка­ла) балалар туу һәм гаилә коручылар саны 2023 елдагы бе­лән чагыштырганда кимрәк. Олы Нырты җирлегендә табигый үсеш бөтенләй булмаган. Нибары бер пар язылышкан. Мишә авыл җирлегендә дә 25-45 яшьләрдәге өйләнмәгән 67 ир кеше бар. Җыеннарда бирелгән сорауларга килгәндә, Кызыл Мишә авылында балаларга спорт белән уен мәйданчыгы булдыру, электр көчәнеше уйнавын бетерү, Тимершыкта зират янындагы урамга багана утлары кую мәсьәләләре күтәрелде. Җирлек башлыгы Айдар Хаҗиев җавабыннан кү­ренгәнчә, әлеге проблемалар 2025-2026 елларда хәл ителергә тиеш. Олы Шыңардагы җыенда махсус хәрби операциядә катнашучы егетнең өе авария хәлендә булу сәбәпле, яңа йорт салуга кагылышлы җибәргән соравына район башлыгы урынбасары Расих Закирҗанов җавап бирде