Балалар һөнәргә өйрәнә

  Балаларга кече яшьтән  һөнәри юнәлеш бирү, эшче һөнәрләргә мәхәббәт тәрбияләү максатыннан гамәлгә ашырылган “Яшь мастер» бәйгесе быел районыбызда дүртенче тапкыр уза.  Барлыгы  15 компетенцияне үз эченә алган  бәйгедә 70тән артык  бала төрле һөнәрләр буенча үзенең осталыгын һәм белемен күрсәтә алачак.

14 февральдә Сабаның “Бәләкәч” балалар бакчасында районыбызның мәктәпкәчә учреждениеләреннән сигез бала “Чәчтараш эше” буенча осталыкта сынашты. Бәйге шарты буенча кызлар иң элек чәчтараш хезмәтенең нечкәлекләре  белән таныштырдылар  һәм  төрле предметлар сурәтләнгән  кәгазь карточкалар арасыннан  әлеге һөнәргә бәйле   булганнарын  тиз арада сайлап алып,  үзләренең ныклы әзерлекле булуларын күрсәттеләр. Ә икенче этап тагын да кызыклы, монда    нәни чәчтарашлар 20 минут эчендә модель булып  килгән дусларына көндәлек өчен чәчләр җыелган хәлдәге  прическа ясау  буенча осталыкта сынаштылар. Кечкенәдән матурлыкны тоя белү һәм  аны үз кулларың белән булдыра алуны  үз эченә алган бу  бәйгедә чын мәгънәсендә кызларның фантазиясе эшкә җигелде. Тәрбияче –остазлары белән бергә модельләре  дә  рухи көч өстәп торды. Иң беренчеләрдән булып Сабаның “Балачак” балалар бакчасына йөрүче  Аида Сәхабиева  модель булып килгән дусты Ясминәнең чәчен матур итеп    ясап өлгерде.  Аиданың бу эшкә кулы ятып торганлыгы әллә каян күзгә ташлана.  “Әнием дә парикмахер булып эшли. Миңа да бу эш бик ошый.  Үскәч мин дә   әнием кебек оста парикмахер булырга телим. Өйдә дә, тәрбияче апаларым  белән дә чәчне матур итеп ясау серләренә өйрәндек”, – ди Аида.  Кызына көч өстәп торырга  әнисе Алсу да килгән иде. Нинди генә хезмәт булмасын, башкарган эшең   иң беренче клиентка ошарга тиеш. Бу көнне  дә  һәр модель үзенең чәченнән канәгать калды. Һәрбер прическа   үзенчәлекле, кабатланмас булулары белән аерылып торып, кызларга  төрле номинацияләр буенча бүләкләр тапшырылды. Камилә Хөсәенова (Явлаштау)  – иң аралашучан  чәчтараш, Аида Сәхабиева (“Балачак”) – иң ягымлы, Лея Апаева  (Шәмәрдән “Теремок”) – иң пөхтә,  Мәдинә Руппа (Шәмәрдән, “Әкият”) – иң креатив, Әминә Мәхмүтова  (Олы Арташ, “Әкият”) – иң тырыш чәчтараш буларак танылды. Өченче дәрәҗә дипломны Мәдинә Арсланова (“Бәләкәч”), икенче урынны “Шатлык” балалар бакчасыннан Асель Нәҗметдинова, беренче урынны  Сабаның “Әллүки” балалар бакчасыннан Нәфисә Хәйриева яулады.  “Мине чәчтараш булырга тәрбияче   Кадрия Айратовна өйрәтте. Бөтен бәйгеләрдә дә катнашам.  Пластилин бәйгесендә дә беренче урынны алдым.  Моделем   Айзирәк Сөн­гатовага  да мин ясаган чәч бик ошады”, – ди әлеге бәйгенең җи­ңүчесе булып танылган Нәфисә. Асель Нәҗметдинова һәм Нәфисә Хәйриева фестивальнең март аенда узачак республика этабында катнашачаклар.