Балыкчылар кабат ярышты

1999 елдан бирле дәвам иткән бу ярыш соңгы 10 елда Чулман  елгасы бозында оештырыла. Чөнки соңгы елларда районыбыз буйлап агучы  Олы Мишә һәм Кече Мишә елгаларында боз ышанычлы булмый. Моңа сәбәпче булып елгалардагы көчле агым һәм кышларның җылы килүе тора.

Алмаз Вәлиуллин,  Нәкыя Вафина,  Резеда Хафизова, Алмаз Мө­хәммәтшин, Илнар Әхмәтов,  Руслан Хаҗипов, Илнар Сөнгатуллин иганәчелегендә уздырылган бәйге “Иң зур судак”, “Иң зур берш”, “Иң беренче балык тотучы”, “Иң өлкән яшьтәге” һәм “Иң яшь балыкчы” номинацияләрендә үткәрелде.

26 ел дәвамында үткәрелеп, соңгы елларда Теләче балыкчылары да катнашучы бу бәйгенең  үзенчәлекле өлешләре дә бар иде. Бүтән еллардан аермалы буларак,  мотособакалар дип аталган, кешеләрне ялкаулыкка өндәүче җайланмалар ярдәмендә Чулманның теләгән почмагына барып балык тоту рөхсәт ителде. Иң мөһиме –ярышның башында исемлеккә керү һәм әйтелгән сәгатьтә йомгаклау өлешендә катнашу иде.

Замана алга барып,  балык тотар өчен  җайланмалар  (яңача төр катушкалы кармаклар, ратлин, балансир, эхолотлар) ат бәясе торса да,  балык тоту һаман кимеми. Элек балыксыз кайтуны күз алдына китерү дә кыен иде, хәзер гадәти хәл санала.  Иртәгә ярыш буласы көнне  Сабаның имам-хатибы Айнур хәзрәт өйгә килде. “Ике  ярышта катнашып буш кайткан идем, күңелдә калган. Шуның өчен бөтенләй балык чиртмәүче ике кешегә  махсус призлар алып килдем”, – дип  бүләкләрен калдырып китте. 

Иртәнге 7:30 сәгатьтә  башланган ярыш сизелми дә узып,  нәтиҗәләр чыгара торган 16:00 сәгать бик тиз сукты. Беренче балык тоту номинациясенең дә төп таләбе – балыкның тотылган вакыты телефон экранында күренергә тиеш иде.   Сер түгел, меңнәрчә балыкчы катнашкан ярышларда  алдау-ялганнар кү­рергә туры килде. Озак вакытлар суыткычта  ятып, кибеп-саргаеп, коерыклары сынып беткән балыклар алып килеп, номинацияләргә куеп, бүләк өмет итеп торучылар да булмады түгел. “Иң беренче балык тотучы” номинациясендә сабалыларга тиңнәр  булмады. Беренче  урынны   Фәнил Мөбарәкҗанов, икенчене –  Марсель Галимҗанов, 3нче урынны   Расих Һадиев яулады.

Шушы бәйгене оештыручы һәм хөкемдар буларак, иң зур судак тоту буенча ярышны телефонга урнаштырылган балыкчылар төркеме аша күзәтеп бардым. Шунысы бар, балыкларның зурлыгын чагыштырмача күзаллап булса да, авырлыгын телефон аша төгәл белеп булмый. Шуңа җиңүчеләрне ачыклау өчен тотылган балыкларны үлчәү үткәрелә. Бу номинациядә икшермәлеләр барысының да борынына чиертте. Үзем дә шул як тумасы буларак, Хәниф авылдашларын яклады дип әйтүләреннән куркып та куйдым.

Иске Икшермә егете, Теләче үзәк шифахәнәсендә теш табибы булып эшләүче Альмир Закиров  1,800 килолы судак балыгы тотып,  1 урынга лаек булды.  Татар Икшермәсендә туып, Те­ләчедә яшәүче Илдус  Фәрхуллин 1,700 килолы судагы белән 2 урынны яулады. Татар Икшермәсе авылында туып, Байлар Сабасында яшәүче Алмаз  Мияссәров якташларыннан азга калышып,  аның балыгы  1,5 кило тәшкил итте.

Балык тоту ярышлары иң га­делләрдән  санала, чөнки балыкка аңа барыбер. Министрмы син, көтүчеме, әсбапларың 100 меңлекме яисә 100 сумлыкмы, чиныңа һәм әсбапларыңа карап тормый.   Аның үз вакыты бар, эләгәсе булса эләгә,теләмәсә, атна буе көт –барыбер чиертми. Югарыда язылган сүзләрне раслау  өчен генә дәлил китерәм. Минем 60 яшемә бүләк ителгән кармак катушкасы, чехолы,  плетенкасы белән 19000  сумга  якын тора. Шуңа 21000 сумлык  “Практик-8” эхолотын, “Айсберг” боз тишү җайланмасы белән 9 амперлы шуруповертны кушабыз, тагын 20 мең өстәлә ... Янәдән  20 мең чамасы торган киемне кушабыз.   Нәтиҗәдә  80000 сум килеп чыга.   Ә мин көне буена 300-400 граммлы берш балыгы тоттым. Судак балыгының килосы бүгенге көндә 300 сум торганын искәртсәк, 80000  сумга мин 267 кило судак сатып ала алам. Әле бу бәягә юл чыгымнары һәм һәр берсе-1000-1500 сум торган күпсанлы ратлин, балансирлар  керми. Тик балыкчы бернинди чыгымга да карамый. Чөнки үзен нормаль кеше дип санаган һәрбер шәхеснең шөгыле булырга тиеш. Ә яраткан шөгыльгә бернинди акча да жәл түгел.

“Иң зур берш” номинациясендә җиңүчеләрне ачыклаганда кызык хәлгә тап булдык. Берш күп кешегә капмаган, эләккәннәре вак булып кире бәкегә җибәрелгән булып чыкты. Беренче урынны  Фәнис Гатауллин, икенчене Газинур  Вафин,  өчен­че урынны   Рәмис Нурисламов  алды.

Иң өлкән яшьтәге балыкчы булып сабалы, 75 яшен тутыручы  Вакыйф Җамалиев, иң яшь балыкчы булып  Олы Нырсы авылыннан Булат Сафин танылды.

Барлык җиңүчеләр һәм призерлар Саба муниципаль районы башкарма комитетының спорт һәм яшьләр эшләре бүлеге Мактау грамоталары һәм иганәчеләрнең  кыйммәтле бүләкләренә ия булдылар. Спорт бүлеге тарафыннан ветеран балыкчыларга ярышка бару өчен микроавтобус бирүе дә мактауга лаек.

Хәниф Тимербаев,

ярышларны оештыручы.