Эш рәтен белеп үсәләр

  Ел дәвамында мәктәп пар­тасы артында утырган ба­лалар өчен каникуллар кө­телгән ял булса, 14 яшьтән югарылар өчен җәй – акча эшләп алу вакыты да. Җәйге чорны файдалы үткәрү максатыннан, районыбызда урнашкан оешмалар 14 яше тулган балаларга эш тәкъдим итә. Бу үз чиратында акча эшләргә, матди хәлне яхшыртырга, яшүсмерләрнең буш вакытын файдалы уздыруга ярдәм булып тора. Әлбәттә, хезмәт килешүе 14 яшькә җиткән яшүсмер белән бары тик ата-ана яки аны алмаштыручы зат ризалыгы белән генә төзелергә мөмкин.

Укучыларның эш урыннары белән танышу, аралашу максатыннан Түбән Шытсу авыл җирлегенә юл тоттык. “Укудан кала өстәмә эш белән шөгыльләнү – балага тәрбия чарасы булып тора. Моннан тыш укучы финанс хәлен яхшырта. Эшләп үскән бала уңышка ирешә, югалып калмый”, – ди Түбән Шытсу авыл җирлеге башлыгы Булат Мәүлетов.

Балалар җәйге чорда “Шытсу” авыл хуҗалыгы җәм­гыятендә эшли. Июнь-июль айларында узган ел да, быел да Югары һәм Түбән Шытсу авылларыннан 12 бала хезмәттә. “Быел июнь аенда 4 бала эшләсә, июль аенда аларның саны – 8 булды. Тырышып эшләгән укучыларга Белем бәйрәмендә, рәх­мәт йөзеннән, “Шытсу” авыл хуҗалыгы җәмгыяте ди­ректоры тарафыннан өс­тәмә пре­мияләр бирелә”, – ди Тү­бән Шытсу төп мәктәбе дирек­торы Илнур Әхмәтшин.

Балалар көненә 4 сәгать эшли. Койма-рәшәткәләрне буяу, мал торакларының стеналарын агарту, хуҗалык биләмәсендә печән, чүп үлән­нәрен чабу, тәртипкә ки­терү, терлекчелек торакларында чистарту, юу белән шөгыльләнәләр. “Алдагы айда түбәнрәк сыйныфлар булса, июльдә 9нчы һәм 10нчы сыйныфларны тәмамлаучылар эшли. Балалар җәйге чорда авыл хуҗалыгы эшчәнлегенә бик зур өлешләрен кертә. Кул­лары эшкә өйрәнеп,  әти-әниләренә зур булышчылар үсә”, – ди “Шытсу” авыл ху­җа­лыгы җәмгыяте зоотехнигы Гү­зәл Сафиуллина.

“Эшләгәнең кеше өчен булса, өйрәнгәнең үзең өчен”, дип, белми әйтми халык. Алдагы тормышларында да әлеге яшүсмерләргә югалып калмыйча, үз юлларын һәм яратып эшли ала торган хез­мәт урыннарын табарга зур ярдәм булачак.

Рашат Хәбибрахманов 9нчы сыйныфны тәмамлаган. “Гел әти-әнидән дә акча сорап торасы килми бит. Ә болай җәй ае файдалы үтә. Акча тотарга да, эшләргә дә өйрәнәсең”, – ди ул.

Рашатның сыйныфташы Ди­нә Шакирова да биредә эшли. Без килгәндә алар кыз­лар белән җәйге утардагы тимер торбаларны буйый иделәр. “Үз теләгем бе­лән эшкә кердем. Каникуллар тәмамланып, мәктәпкә кирәк-яраклар алу өчен дип, үземә акча эшләү максаты куйдым. Син эштән тү­гел, ә эш синнән куркырга тиеш дип саныйм”, – дип үз фи­керләре белән уртаклашты Динә