Фидаил Хисамиев үзенең ярдәмчеләре белән СВОдагы егетләребез өчен окоп шәмнәре ясый (видео)

Илгә тынычлык  килгәнгә

Сиксән  ел да юк бит әле.

Солдатларга  кабат кирәк

Окоп шәме, окоп шәме...

 Чыннан да, ул Беренче Бөтендөнья сугышында  ук киң таралган булган. Илгә фашизм  явы ябырылгач та, солдат тормышының мөһим атрибутына әйләнгән. Инде XXI гасырда  да  окоп  шәмнәренә сорау туар дип  кем  уйлаган? Аларны хәзер Донбасстагы махсус хәрби операциядә катнашучы хәрбиләр куллана. Алар белән блиндажны  яктыртырга,  ашый торган ризыкны җылытырга  һәм кием киптерергә була. Әмма шәмнең гомере күләменә  карап, 4-8 сәгатьтән  артмый. Бик  күп  кирәк  ул. Юлбат  авылында  яшәүче, хуҗалыкта   агроном  булып  эшләүче Фидаил Хисамиев шуны аңлаган  хәлдә игелекле эшкә үз өлешен кертергә була. Үзе генә башкарып  чыга  алмасын  аңлагач,  авылдашларын  да  тарта.

  “2023 елның октябрь ахырларында, көннәр салкынайта башлагач, волонтерлар төркемендә статуста Рамил исемле егетнең калай банкалар җыюы турында хәбәр күрдем дә, кызыксынып киттем. Иләбәргә бер капчык банка илтеп бирдем. Аннары үзем шәм ясап карарга булдым. Өч кило парафин алып кайтып, эшкә  керештем.  Бурып  чыкканын  күргәч. яңадан  20  кило парафинга заказ бирдем,  35ләп шәм килеп чыкты.  Аларны Сабага волонтерларга алып менеп бирдем. Тукталасы килми бит. Рамил Хәбирҗановтан үзем тапшырганнардан тыш, яңадан 3 капчык банка алып кайттым. Татарстан буенча СВОдагылар язмышына битараф булмаган кешеләр берләшкән “Заказ парафина” төркеменә кердем. Ә шәмнәрнең күпме кирәк икәнлеген блиндаждан төшерелгән видеоны карагач  аңладым. Күз  алдына  да  китерә торган түгел. Егетләр  4-5 уртага  яндырып куйганнар. Яктырта, күпмедер җылы да бирәдер. Минем 35 шәмем күп кебек   күренсә дә, бер тәүлеклек кенә икән, ләбаса. Димәк, үзем генә эшләгәндә колач җәймәслек хәл икәнлеген  аңладым.  Туганнарга,  авылдашларга кирәк материаллар җыю турында мөрәҗәгать белән чыктым. Бездә бит  халыкны  кузгатып  кына җибәрергә  кирәк. Акча җыела башлады, күрше 5 меңлекне тотып керде. Шулай итеп, 2023нең Яңа  ел  каникулы алдыннан  600-700  килограмм парафин бар  иде”,– дип  сөйли Фидаил Хисамиев.

   Шәм  ясау башта  мунча алдында бара.

Видеода Фидаил шәм өчен ясалган кечкенә мичләрне күрсәтә, ярдәм күрсәткән кешеләргә рәхмәтен җиткерә.

Тулырак «Саба таңнары»нда  укыгыз