Кырбаш авылында Май чабу бәйрәме

 Май чабу – күңелле итеп кышны озату, табигатькә җанлану һәм кояш җылысы алып килүче язны каршылау бәйрәме. Ул христиан динен тотучыларның Бөек пост башланыр алдыннан җиде көн, Пасхага кадәр җиде атна алдан билгеләп үтелә. Бәйрәм датасы ел саен төрле. 2025 елда Май чабу 24  февраль-2 мартка туры килә. Коймак – Май чабу атнасының иң дәрәҗәле сые, ул язгы бәйрәмнең символы булып тора.  Кырбаш  авылында 2 мартта кышны озатуга багышланган халык  күңел  ачуы үткәрелде. Иң элек  Шәмәрдән  авыл җирлеге башлыгы  Альберт Вәлиев котлау  сүзе белән  чыкты. Авыл  халкын һәм  кунакларны бай эчтәлекле программа  көтә  иде. Бәйрәм “Май  чабуны  каршылыйбыз  –коймак белән  котлыйбыз”дип исемләнгән театральләштерелгән уен  белән башланды. Әкият геройлары  авыл  кешеләрен конкусларда  катнашырга  чакырдылар. Дәртле халык җырлары һәм такмазалар һәркемнең  күңелен   күтәрде. Әйлән-бәйлән, мендәр белән сугулар, “Звонарь” һәм башка уеннардан  соң Карачкы  яндыру тамашасы булды. Катнашучылар кайнар  коймак, баллы чәй белән  сыйланды. Май чабу бәйрәмендә 80нән артык кеше  катнашты.

Надежда Черненко.