Парадта – йолдызлар яңгыры

Фәнил Мәүлетов, Фәридә Вилданова, 27 декабрь 2019 - 08:47

1065

Финляндиядә ул – Йолупукки, Германиядә – Вайнахстман, Испаниядә – Юлебукк, Кытайда – Шэнь Дань Лаожэнь, Голландиядә – Синтеркласс... Ә без аны үзебезчә, ягымлы итеп, Кыш бабай дип йөртәбез. Дөньяның төрле тарафларында төрлечә аталса, киенсә дә, төрле холык-табигатькә ия булса да, киң күңелле бабакайны һәр җирдә олысы-кечесе бердәй тигез ярата, сагынып көтеп ала. Ә 25 декабрь кичендә сабалылар үзләрен, гомумән, Кыш бабайлар илендә кебек хис иткәннәрдер. Хәер, нишләп сабалылар гына, тамаша күрергә авыллардан да күп килделәр бит.

Көндез үк кайбер оешмаларда Кыш бабайлар күренә башлаган иде.

Кичкә алар барысы бергә Сабаның үзәгендә очрашты. Бу мизгелләр, чыннан да, әкияти иде: 50гә якын Кыш бабай, Кар кызы, аларның юлдашлары, райондашларга бусагада кабат Яңа ел икәнен искәртте. Югыйсә әле генә дуңгыз елын каршылаган идек. Ә шушы традиция гамәлгә кергәннән алып санасаң, Көнчыгыш календаре символларының инде 16нчы тапкыр халык алдына чыгулары. Димәк, инде 16нчы мәртәбә хезмәттәге уңышларыбызны парад ясап билгеләп үтәбез.

Тамашаны, гадәттәгечә, мәдәният хезмәткәрләре башлады. Быел алар йолдызлар булып киенгәннәр иде. Бу көннәрдә эше бик тыгыз булган мәдәният хезмәткәрләренең. Бәйрәмгә әзерлек эшләрен дә читкә куймыйча, костюм теккәннәр. “Күктә дә моның кадәр йолдыз юк. Искиткеч тамаша! Сезнең каршыгыздан 300дән артык йолдыз үтә. Әйдәгез, бергәләп сәламлик аларны”,– диде парад белән таныштырып торучы Реналь Гыйниятов. Мәктәпкәчә яшьтәгеләр учреждениеләре хезмәткәрләренең әзерлеге дә сокландырды. Быел парадта Туктар авылының “Тамчы” балалар бакчасы коллективы да катнашты. Бик шат күренсәләр дә, бераз күңелсезләнергә дә сәбәпләре бар икән. “Бакчабызда балалар саны кими башлады.

Шуңа күрә без бик борчылып, Сабада парадта катнашабыз, Яңа елда балаларыбыз артсын иде”,– диде бакча мөдире Фәридә Ибәтуллина. Алар этеп барган бәби арбаларының берничәсе нигә буш икәнлеген аңладык хәзер. Шунысы куанычлы, 2019 елда районда никахлар күбрәк теркәлде. Димәк, быел балалар да күбрәк туар дип көтик. Җәяүлеләр парадында катнашучылар 2020 елда көтелгән юбилейларны чагылдыруга зур әһәмият биргән. Моның гәүдәләнеше социаль яклау бүлеге һәм учреждениеләре хезмәткәрләре мәйданнан үткәндә аеруча ачык күренде...

Тулырак язманы "Саба таңнары" газетасында укый аласыз

Фоторепортаж: http://saby-rt.ru/news/fotoreportazhlar/yaa-el-parady-2019

Бүләкләнүчеләр: