Райондашларыбыз Кукмара мәдрәсәсен тәмамлаганлыкка диплом алды

Кукмара мәдрәсәсендә уку елын төгәлләүче мөһим чарада райондашларыбыз да катнашты. 1998 елдан эшләп килүче дини уку йорты өчен быелгы чыгарылыш 25 нче. Тантаналы чарада Саба районы мөхтәсибе Айнур хәзрәт Әхмәтов, әлеге уку йортында белем бирүче райондашыбыз-Лесхоз мәчете имамы Әхмәд хәзрәт Сафин та катнашты. Мәдрәсәне барлыгы 76 кеше тәмамлаган. Шуларның 14е -имам-хатыйблар һәм ислам нигезләре мөгаллимнәре әзерли торган һөнәри бүлектә белем алган. Аларга урта һөнәри дини белем алуны раслаучы дипломнар тапшырылган. Калган шәкертләргә-  мәдрәсәнең башлангыч бүлеген тәмамлаучыларга башлангыч дини белем алу турындагы таныклыклар бирелгән. Диплом ияләре арасында безнең райондашларыбыз - Сабадан Дания Гайфуллина, Фирая Абдуллина һәм Гөлгенә Дәүләтова, Тимершыктан Рамил Газизов та бар. Котлыйбыз! Хәерле вә файдалы гыйлемнәр булсын!