Саба урта мәктәбендә өлкән буын укытучылары очрашты

  Бөтен гомерләрен районы­бызның төрле мәктәпләрендә укучыларга белем һәм тәрбия бирүгә багышлаган, инде күп еллардан бирле күрешмәгән мөхтәрәм укытучылар өчен әлеге очрашуның никадәр көтелгән һәм кадерле икәнлеге сүзсез дә аңлашыла иде. Чөнки сөйләшеп сүзләре бетмәде,  хатирәләр күз яшьләре аша барланды,  һәрбер хезмәттәш кочак җәеп каршы алынды, җылы очрашуга һәрберсе сабыйларча шатланды.

Чараны оештырган Саба мәдәният йорты хезмәткәре Хә­ниф Тимербаев әйтүенчә, районыбызда гомерләрен балаларга белем һәм тәрбия бирүгә ба­гышлаган 70 яшьтән югары 105 ветеран укытучы бар. Бәйрәм чарасында аларның 80е кат­нашты. Хөрмәтле ветеран мөгаллимнәрне район башлыгы урынбасары Расих Закирҗанов тәбрикләде.

"Бүгенге заманча мәктәп, мәгарифтәге хәзерге мөм­кинлекләр белән таныштыгыз. Әлбәттә, биналар, җи­һазлану яхшырганнан яхшыра. Әмма кайсы гына чорда булмасын, укытучы хезмәте, балаларга ныклы белем һәм тәрбия бирү бурычы үзгәрешсез кала. Илнең башында торучылар – укытучылар. Сез һәрберегез үз хезмәтегезне югары дәрәҗәдә башкарып, хөрмәт казанган шәхесләр. Сезгә бик зур рәхмәт", – диде ул үз чыгышында.

"Күпме концертлар алып барып та болай дулкынланганым юк иде. Моңа аптырыйсы юк. Бүген 80 укытучы каршында имтихан тотарга кирәк. Бу бит класста бер укытучы алдында гына имтихан тапшыру түгел", – дип шаяртса да, Хәниф Тимербаев чираттагы сынавын уңышлы үтте.

Район мәгариф идарәсе начальнигы урынбасары Айгөл Хәнәфиева да үз чыгышын укытучыларга олы хөрмәт сүзләре белән башлады.

"Еш кына:"Бу синең элекке укытучыңмы?- дип сорарга яраталар. Укытучы элекке була алмый. Укытучы дигән горур исем һәрвакыт аныкы булып кала. Ул һәрвакыт яшь. Сезнең тәҗрибәне берни белән дә алыштырып булмый. Шуңа да мәктәпкә очрашуларга чакырганда бөтен көчегезне туплап, яшьләргә, укытучыларга түкми-чәчми таратыгыз. Әле сезгә озак еллар шулай залларны бизәргә язсын", – диде Айгөл Хәнәфиева.

Ча­рада катнашкан өлкән укы­тучыларның берсе – тиздән 90 яшен тутыручы Фәрит Нәҗ­­метдинов та (Иске Ик­шер­мәдән) хөрмәтләнеп, аның да хезмәттәшләре белән ур­так­ла­шыр хис-кичерешләре күп иде.

Үзенең 42 ел гомерен мә­га­риф­кә багышлап, шунын 27 елын Саба гимназиясендә био­ло­гия һәм химия фәненнән белем биргән Рәфидә Миниханова да республика кү­ләмендә күренекле шәхесләр тәр­бия­лә­гән, Татарстан Республикасы Рәисе Рөстәм Нургали улы Миң­нехановка белем биргән хөр­мәтле мөгаллимәләрнең бер­се. “Без бик хөрмәтле пенсионерлар. Бер көн эшкә бармыйча, кыңгырауга йөгермичә, ай саен акча китереп бирәләр. Безнең картлыгыбыз бик­ мул заманга туры килде. Мин Са­ба мәктәбенә Мамадыштан эшкә килгәндә 1200 бала укый иде.  Бер бинада өчәр смена эшләдек. Өченче сменада кичке мәктәптә укыттык. Истәлекле матур елларны уздык. Данлыклы, көчле коллективы булган Саба мәктәбендә укытуым белән горурланам”, – дип үткәннәрне барлады Рәфидә Мансур кызы.

Озак еллар Шәмәрдән мәк­тәбендә балаларга белем һәм тәрбия биргән Сәрия Хө­сәенова, Саба гимназиясенең мөх­тәрәм укытучысы Физия Шәй­хетдинова да истәлекләре белән уртаклаштылар. Физия Корбан кызы 2007 елдан лаеклы ялдагы укытучыларны берләштерүче “Хатирә” клубы оештырылуы, 16 ел эчендә 19 хез­­мәт­тәшләрен югалтуларын әйтеп узды.

Җылы очрашу район мәдәният йорты каршында эшләп ки­лү­­че "Саба чишмәләре” иҗат бер­ләшмәсе, районыбызның сәхнә ос­талары, "Салават" җыр театры ар­тистларының матур чыгышлары бе­лән үрелеп алып барылды.

“Бик матур, җылы очрашуда булдык. Элеккеге хезмәттәшләрне, ос­тазларыбызны күрү күңелләргә җылылык өстәде. Иң беренче заманча мәктәпне, мондагы шартларны, зәвыклылыкны күреп сок­ландык. Директор бөтен белем йорты белән якыннан таныштырды. Мондый матур чараны оештыручыларга бик зур рәхмәт”, – диде мәгарифкә 35 ел гомерен багышлаган Юлбат авылыннан Мәрзия Халикова