“Светофор” дусларын җыйды

Әти-әниләр  шуны  яхшы  белә: мәктәпкәчә яшь­тә­геләр учреждение­лә­рендә  юлларда йөрү кагый­дә­ләрен өйрәнүгә һәм аларны үтәүгә кызыксыну тәр­бия­ләү юнәлешендә  күп шө­гыльләр үткәрәләр. Өй­­­ләренә кайткач, бала­лар­ның   сүзе шул хакта гына. Ә иҗат үзәгендә  “Све­тофор дусларын җыя” конкурсы булган  көнне нәниләрнең теле-телгә  йок­­мады. Кем җиңгән, “Юл­ларда күренеп тор” театраль тамашада дуслары ничек  уйнаган – шул хакта  сөйләделәр. Мәктәпкәчә учреждениеләрдә  юл хә­рә­кәте кагыйдәләренә  өй­­­рә­түләрен күрсәтергә 11 бакчадан  килгән 110 ба­­ла  чыкты. Аларны конкурс­ка әзерләүдә әниләр үз­ләре дә тырышты. Әйтик, “Безнең гаилә юл йөрү кагыйдәләренә буйсына” темасына фотоколлаж ясауда Никита Захаровның (Шә­мәрдәннең “Әкият” балалар бакчасы) җиңү яулавында әнисе Татьяна Валерьевнаның да өлеше зур. Вакытларын  кызганмыйлар әниләр, балалары юл казаларына тарымасын өчен кайгырталар.   Бола­ры – өй эше. Бакчалар театраль күренеш номинациясенә дә зурдан кубып әзерлән­гәннәр: коридорлар жезллар, зебра рәсеме, юл билгеләре, светофор рәсеме, юл йө­рү кагыйдәләре буен­ча плакатлар, транспорт чаралары төшергән рә­семнәр белән тулы  иде. Тәрбиячеләр һәм балалар бу юнәлештә үзләренең зур әзерлекләрен курсәттеләр, тамашачыларны һәм жюрины бай эчтәлекле, кү­ңелле чыгышлары белән сөендерделәр. Конкурсның нәтиҗәләрен мәгариф  ида­рәсенең мәк­тәпкәчә тәр­бия буенча  ме­тодисты Алинә Салихова игълан итте. Бер  үк яшьтәге балалар тупланган мәктәпкәчә әзерлек учреждениеләре арасын­да “Бәләкәч” бакчасы (Са­ба) җиңү  яулады (фото).  Икенче-өченче  урыннарда Шәмәрдәннең “Әки­ят” һәм “Сала­ват  күпере” бакча­лары. Авыл балалары арасында (төр­ле яшьтәге  балалар)  Шекше “Ак­чарлак” балалар бакчасы коллективын  алкышладылар. “Иң яхшы методик эшләнмә” номинацияләрендә Гө­лшат Сәй­фет­динова (“Әллүки”) белән Диләрә Мө­хәммәтшинага (Олы Кибәче) тиңнәр булмады. Конкурста җи­ңүчеләрне  ЮХИДИнең рай­он бүлекчәсе   өлкән инс­пекторы Илнур Насый­буллин бүләкләде һәм балалар арасында профи­лактика эшен нәтиҗәле  алып  баручыларга рәхмәт белдерде. “Юл хәрәкәте иминлеге”дәүләт бюджет учреждениесенең район бү­лекчәсе начальнигы Гү­зәл Ягәфәрова балаларга 20 мең  сумлык бүләк  алып  килгән  иде. Призерлар юл хәрәкәтендә катнашуның иң беренче транспорты – велосипедлы булды.

Фәнил Мәүлетов фотолары