Түбән Утар авылында "Саф сулы- Ямьле Саба" проекты үтте

автор, 10 сентябрь 2021 - 14:24

923

Чишмә - чисталык, сафлык, пакьлек билгесе. Гадел, киң күңелле, эчкерсез кешеләрне чишмә суының сафлыгына тиңлиләр. Чишмә суы тылсымлы көчкә ия, шуңа күрә борынгыдан изге чишмәләр, шифа чишмәләре турында легендалар, мифлар яши, җырлар, шигырьләр чыгаралар. Чишмә суы авырткан йөрәкләргә шифа, сагынган күңелләргә дәва. Алар - көч, дәрт чыганагы да. Чишмәләр гомер-гомергә шагыйрьләр, рәссамнар, композиторлар өчен илһам чишмәсе булып хезмәт иткән.

Түбән Утар авылында "Саф сулы- Ямьле Саба" проекты үтте

Чишмә - ул сәламәтлек нигезе. Чишмә - ул изге җир! Бәлки, ул Җир ананың керсез күз яшедер. Ул үзенең сафлыгы белән кешеләрнең гүзәл хисләрен ача. Шуңа күрә җир җәннәт ул. Үзенә яхшылык эшләгән кешегә җир сөйкемле. Һәр авылның тирә-юне табигатен су чыганаклары бизи, чөнки халыкның тормышы су белән бәйле.

9 нчы сентябрь көнне Түбән Утар авылында урнашкан "Бикә" чишмәсе янында, Курсабаш авыл китапханәчесе, Курсабаш авыл клубы мөдире, Өчиле авыл клубы мөдире, Түбән Утар авыл клубы мөдире, Курсабаш һәм Түбән Утар авыл халкы белән берлектә "Саф сулы - Ямьле Саба" проекты кысаларында "Чишмәләр иле син туган як" дигән бәйрәм чарасы уздырылды. Иң элек кунакларны бөек икмәк һәм баллы чәк-чәк белән каршы алдылар. Чишмәләрнең әһәмияте һәм рухи байлыгы турында сөйләнде. Түбән Утар авылы тарихы һәм "Бикә" чишмәсе тарихы белән авыл имамы Нәҗип абый таныштырды. Курсабаш авылында яшәп гомер итүче, үзешчән шагыйрә Халиуллина Минзәлия Исхак кызының тормыш юлы һәм иҗаты яктыртылды. Ул үзенең яңа гына табадан төшкән "Авылым чишмәләре" шигырен сөйләп кунакларны һәм катнашучыларны таң калдырды. Таң суы алу йоласы һәм "Су буенда кичке уен" фольклор номерлары күрсәтелде. Бәйрәм чарабызның йомгаклау өлеше итеп авылдашларга, кунакларга рәхмәт сүзләре әйтелде. Саба үзәкләштерелгән китапханәләр системасы методисты Ильсияр Шакирзянова һәм Гөлнара Мустафина әлеге проектның максатларын һәм әһәмиятен аңлатып үттеләр, рәхмәт сүзләре җиткерделәр.