ТӘРБИЯДӘ КӨН-ТӨН, КАНИКУЛЛАР ЮК

Фәнил Мәүлетов, 6 декабрь 2019 - 07:58

1289

Гаилә һәм мәктәп тыгыз элемтә тотканда һәм балага бердәм таләп куелганда гына тәрбия эше ике якка да канәгатьләнү хисе бирә һәм уңышлы була ала. Мәгарифтәге хезмәттәшлектә каникуллар ясалмавы мөһим. Дүшәмбе кичендә Саба гимназиясендә үткәрелгән районкүләм ата-аналар форумы гаилә һәм мәктәп элемтәсен киңәйтү юлларын эзләүгә багышланды.

Иң элек гимназиянең ата-аналар комитеты чыгыш ясады. Аннары сәхнәгә форумга кадәр мәгариф линиясе буенча зоналарда үткәрелгән "Тату сыйныф серләре", "ГТО нормативларын гаилә белән бергәләп", "Без бергә" ("Иҗади гаилә" номинациясе) бәйгеләрендә җиңүчеләрне тәбрикләү өчен район башлыгы Рәис Миңнеханов чакырылды. “Мондый форумга без тәрбия белем бирү сыйфатын арттыру факторы итеп бик җитди куелган вакытта беренче тапкыр җыелдык. Дөресен әйтергә кирәк, бала гаиләдә үсә һәм беренче чиратта әти-әнисен тыңлый. Өйдәге тәрбия эшенең торышы балаларда көзгедәге кебек ачык күренә. Интернет заманында тәрбия бирү бик җиңел түгел. Интернет балалар күңелен кирәкмәгән әйберләр белән кызыксындыра һәм күпләрне үзенә тарта. Элеккерәк статистикага килсәк, сораштыру катнашкан балаларда яхшы белем алу, һөнәр үзләштерәсе килү теләге 10 процент кына тәшкил иткән. Ә хәзерге көндә иң олы байлык – ул белем һәм ниндидер өлкәдә профессионал булу. Без мәгариф эшендә хөрмәтле әти-әниләр белән бергә балаларны шуңа инандырырга тиеш. Бергә булганда бөтен мәсьәләләр уңай чишелә. Барысы да безнең кулда. Ата-аналар форумнарында ешрак очрашкан саен аның уңай нәтиҗәсе дә күбрәк булачак”,– диде Рәис Миңнеханов һәм әти-әниләрне балалары хакында гел яхшыны гы- на юрарга һәм уйларга чакырды...