Урта Нырты авылында яшәүче Нурсама Нәбиуллина 95 яшьлек юбилеен каршы алды
Нурсама Миннегали кызы юбилее уңаеннан РФ Президенты Владимир Путинның Котлау хатын кабул итеп алды. Аны социаль яклау бүлеге начальнигы Лилия Гайнетдинова, Олы Нырты авыл җирлеге башлыгы Рафис Сәфәргалиев, район мәгариф идарәсе вәкиле тәбрикләде.
Нурсама Нәбиуллина Мамадыш районы Иске Завод авылында туган. 12 яшеннән колхозда эшли башлый, аннан Мамадышта шырпы заводына урнаша. 18 яшендә Кемерово өлкәсенең Киселев шәһәренә китеп, тимер юлда эшли. 1951 елда биредә үзенең булачак тормыш иптәшен – Миннехан Гаяновны очратып, шул ук елда гаилә коралар. 1952 елда иренең туган ягы Урта Нырты авылына кайтып төпләнәләр. Биредә Нурсама апа башта колхозда, аннан урта мәктәптә җыештыручы булып эшләп, лаеклы ялга чыга. 1971 елда ире вафат була. Алты бала тәрбияләп үстерәләр, аларның һәрберсе тормышта үз урыннарын табып яшиләр. Нурсама Нәбиуллина хәзерге көндә Завод Нырты урта мәктәбендә укытучы булып эшләүче улы Илгиз Гаянов белән гомер кичерә. Өлкән яшьтә булуына карамастан, хуҗалыктагы эшләр белән шөгыльләнә.
Следите за самым важным и интересным в Telegram-каналеТатмедиа
Нет комментариев