Олыгайгач, вакыт табыла

– Өлкәннәр арасында әллә нинди һөнәрләргә оста кешеләр елдан-ел арта бара. Районнарга баргач, аларның эшләрен күреп шаккатам. Әле менә агач остасы белән күрештек. Кемдер рәсем ясый, кайберәүләр бисердан чә­чәкләр үрә. Шуларны күргәч, нигә әле талантлы өлкәннәрнең кул эш­лә­рен башкаларга да күрсәтмәскә дигән уй килде. Әнә шул фикерне филармония җитәкчесе Кадыйм Нуруллинга җит­кердек. Ә ул берсүзсез риза булды. Башка җирдә булса, бу күргәзмә өчен акча сорарлар иде, – ди республика ветераннары (пенсионерлары) төбәк иҗтимагый оешмасы рәисе Хә­бир Иш­тирәков. – Моннан ике ел элек Равил Абушаевның бер тапкыр күр­гәзмәсе оештырылган иде. Аның эшләре кү­ңелне иркәли. Нәкъ безнең буын өчен ясалган диярсең. Туган яклар, балачак­лар искә төшә. Матурлыкны күрә белә ул. Яшьләрнең күңе­ленә хуш килер­лекләре дә җитәрлек.  Аның картиналарын һәркем килеп күрә ала.

Руслан Абушаевка – 72 яшь. “Эшләгәндә вакытым җитми иде. Әмма бер генә буш минут булдымы, тизрәк фотоаппарат алам. Табигатьне төше­рергә яратам. Бигрәк тә хатыным Юлия белән балыкка йөргән чаклар ошый. Мин – бик таләпчән кеше. 200 фотодан ике-өчне генә сайлап алырга да мөм­кинмен, – ди ул. – Алты елдан бирле картиналар белән мәш киләм. Әлмәт районында эшләремне күрәләр иде. Республика күләмендә дә зур игътибар бирә  башладылар. Әлбәттә, чакырган җиргә барам. Тик менә картиналарымны  бик сатмыйм. Алар миңа кадерле”.

Күргәзмәгә Татарстанның хезмәт, халыкны эш белән тәэмин итү һәм социаль яклау министры урынбасары Юлия Абдреева да килгән иде.

–  Яшь вакытта кайбер кешеләр яраткан шө­гыленә вакыт  таба алмый. Менә хәзер, олыгайгач, аларның яңа сулышлары ачыла. Күп кенә кешеләр үз эш­ләрен күрсәтә башладылар, – диде ул.

http://www.vatantat.ru