Болгар җыенында катнаштылар

автор, 8 июнь 2021 - 14:41

734

Узган шимбәдә борынгы Болгар шәһәре биләмәсендә “Изге Болгар җыены” узды. Чарада Татарстан Республикасы Президенты Рөстәм Миңнеханов, Дәүләт киңәшчесе Минтимер Шәймиев, ТР мөселманнары Диния нәзарәте рәисе Камил хәзрәт Сәмигуллин, Бөтенроссия татар дин әһелләре форумы делегатлары катнашты. Изге чарага Саба районыннан да махсус автобус белән 27 кешелек делегация барды.

Җыенда катнашучылар Болгар җиренең истәлекле урыннары белән таныштылар, данлыклы Ак мәчеттә булдылар, җәмәгать белән тәүбә намазы укыдылар. Җыенга килүчеләр өчен оештырылган күргәзмә-сату мәйданчыгында Саба һөнәрчеләре җитештергән сувенир эшләнмәләр дә тәкъдим ителде. Райондашларыбыз Лилия һәм Фәрит Вафиннар теккән чигүле мендәрләрне, ашъяулык һәм намазлыкларны чит төбәкләрдән килүчеләр бик яратып сатып алган.