«Фермер мәктәбе»ндә практик дәресләр башланды

Укулар Зеленодольск районының Кадәрия Лотфуллина КФХ базасында узды. Предприятиекүркәләр, шулай ук бройлерлар үстерү һәм аларны эшкәртү белән шөгыльләнә.

Эшкуарлык эшчәнлеген оештыру һәм алып бару мәсьәләләре турында КФХ башлыгы Лотфуллина сөйләде.

Курс барышында тыңлаучылар яшь кош-кортны карау, аларны ашату процессы һәм сугым цехы эше белән таныштылар.

"Кошчылык фабрикасы буенча экскурсия һәм аның хуҗасы белән очрашу минем өчен аеруча тәэсирле булды. Очрашу бик мавыктыргыч һәм кызыклы булды, кыска гына вакыт эчендә без үзебезне борчыган барлык сорауларга җавап ала алдык. Мин үзем өчен бик күп яңа һәм файдалы мәгълүмат тупладым, бигрәк тә ветеринария буенча. Мондый уңышлы фермерлар белән очрашу яңа эш башлаган авыл хуҗалыгы җитештерүчеләрен югары нәтиҗәләргә рухландыра", – дип үз тәэсирләре белән уртаклашты Лаеш районы фермеры Елена Нигъмәтҗанова.

Очрашу ахырында тыңлаучылар фермер хуҗалыгының үзләре җитештергән продукциясен татып карадылар һәм тәэсирләре белән уртаклаштылар. Бу фермер хуҗалыкларының алга таба хезмәттәшлегенә һәм аларның Татарстан Республикасында үсешенә ярдәм итәр дип ышанабыз.

Якын арада укулар Лаеш һәм Биектау районнарының крестьян (фермер) хуҗалыклары базасында узачак.

«Безнең төп бурыч - яңа эш башлаучы фермерларга авыл хуҗалыгы өлкәсен мөмкин кадәр тирәнрәк өйрәнергә мөмкинлек бирү. Белем бирү программасы эшкуарларга үзләрен кызыксындырган сорауларга җаваплар алырга, авыл хуҗалыгы товарлары җитештерүчеләреннән тәҗрибә тупларга, дәүләт ярдәме чараларын өйрәнергә һәм иң мөһиме - үз бизнес-проектыңны уңышлы башлап җибәрергә яки аны яңа алым белән гамәлгә ашыруны дәвам итәргә мөмкинлек бирәчәк», - дип билгеләп үтте «Россельхозбанк» АҖенең Татарстан филиалы директоры Ләлә Кудермәтова.

Укуларның практик өлешендә 40 күчмә практик дәрес планлаштырылган. Катнашучылар уку йомгаклары буенча “Фермер хуҗалыгы агробизнесы” дигән өстәмә белем бирү программасы буенча дәүләт үрнәгендәге диплом алачаклар.

Фото: Татарстан Республикасы Авыл хуҗалыгы һәм азык-төлек министрлыгы

Чыганак: Татарстан Республикасы Авыл хуҗалыгы һәм азык-төлек министрлыгы