Гүзәл Удачина: Татарстанда ел башыннан бирле егерме бала тәрәзәдән егылып төшкән

Татарстанда 2019 ел башыннан бирле 7 яшькә кадәрле егермедән артык бала тәрәзәдән егылып төшкән. Бу хакта үзенең видеомөрәҗәгатендә Татарстанда Бала хокуклары буенча вәкаләтле вәкиле Гүзәл Удачина сөйләде. Видео Интернетка урнаштырылган.

Тәрәзәдән егылып төшкән ике бала һәлак булган, ә калганнары авыр яралар алган. Соңгы очрак 3 июльдә булды. Чаллыда 6 яшьлек малай 16 каттан автомобиль өстенә егылып төште.

“Гадәттә без мондый хәлләрне тәртипсез яки тәҗрибәсез әти-әниләр белән килеп чыга дип уйлыйбыз. Әмма бу алай түгел”, - диде Гүзәл Удачина. Үзенең видеомөрәҗәгатендә ул ата-аналарга иминлек кагыйдәләрен искәртте.

“Балаларны үзләрен генә калдырмагыз. Тәрәзәләргә чикләгечләр куегыз. Әгәр андый мөмкинлек юк икән, тәрәзә тоткаларын алып куегыз һәм москит челтәрләренә генә ышанмагыз”, - дип искәртте балалар омбудсмены. Гади кагыйдәләрне истә тоту фаҗигаләр һәм югалтулар булдырмый алырга ярдәм итәчәк, диде ул.

Фото: Султан Исхаков

https://tatar-inform.tatar